Aṣṭādaśaḥ sargaḥ
Technical Details
aṣṭādaśaḥ sargaḥ
ājñā-vyākaraṇa
atha dvijo bāla ivāptavedaḥ kṣipraṃ vaṇik prāpta ivāptalābhaḥ|
jitvā ca rājanya ivārisainyaṃ nandaḥ kṛtārtho gurumabhyagacchat||1||
draṣṭuṃ sukhaṃ jñānasamāptikāle gururhi śiṣyasya gurośca śiṣyaḥ|
pariśramaste saphalo mayīti yato didṛkṣāsya munau babhūva||2||
yato hi yenādhigato viśeṣastasyottamāṃso'rhati kartumīḍyām|
āryaḥ sarāgo'pi kṛtajñabhāvāt prakṣīṇamānaḥ kimu vītarāgaḥ||3||
yasyārthakāmaprabhavā hi bhaktistato'sya sā tiṣṭhati rūḍhamūlā|
dharmānvayo yasya tu bhaktirāgastasya prasādo hṛdayāvagāḍhaḥ||4||
kāṣāyavāsāḥ kanakāvadātastataḥ sa mūrdhnā gurave praṇeme|
vāteritaḥ pallavatāmrarāgaḥ puṣpojjvalaśrīriva karṇikāraḥ||5||
athātmanaḥ śiṣyaguṇasya caiva mahāmuneḥ śāstṛguṇasya caiva|
saṃdarśanārthaṃ sa na mānahetoḥ svāṃ kāryasiddhiṃ kathayāmbabhūva||6||
yo dṛṣṭiśalyo hṛdayāvagāḍhaḥ prabho bhṛśaṃ māmatudat sutīkṣṇaḥ|
tvadvākyasaṃdaṃśamukhena me sa samuddhṛtaḥ śalyahṛteva śalyaḥ||7||
kathaṃkathābhāvagatosmi yena chinnaḥ sa niḥsaṃśaya saṃśayo me|
tvacchāsanāt satpathamāgato'smi sudeśikasyeva pathi pranaṣṭaḥ||8||
yatpītamāsvādavaśendriyeṇa darpeṇa kandarpaviṣaṃ mayāsīt|
tanme hataṃ tvadvacanāgadena viṣaṃ vināśīva mahāgadena||9||
kṣayaṃ gataṃ janma nirastajanman saddharmacaryāmuṣito'smi samyak|
kṛtsnaṃ kṛtaṃ me kṛtakārya kāryaṃ lokeṣu bhūto'smi na lokadharmā||10||
maitrīstanīṃ vyañjanacārusāsnāṃ saddharmadugdhāṃ pratibhānaśṛṅgām|
tavāsmi gāṃ sādhu nipīya tṛptastṛṣeva gāmuttama vatsavarṇaḥ||11||
yatpaśyataścādhigamo mamāyaṃ tanme samāsena mune nibodha|
sarvajña kāmaṃ viditaṃ tavaitat svaṃ tūpacāraṃ pravivakṣurasmi||12||
anye'pi santo vimumukṣavo hi śrutvā vimokṣāya nayaṃ parasya|
muktasya rogādiva rogavantastenaiva mārgeṇa sukhaṃ ghaṭante||13||
urvyādikān janmani vedima dhātun nātmānamurvyādiṣu teṣu kiñcit|
yasmādatasteṣu na me'sti saktirbahiśca kāyena samā matirme||14||
skandhāṃśca rūpaprabhṛtīn daśārdhān paśyāmi yasmāccapalānasārān|
anātmakāṃścaiva vadhātmakāṃśca tasmād vimukto'smyaśivebhya ebhyaḥ||15||
yasmācca paśyāmyudayaṃ vyayaṃ ca sarvāsvavasthāsvahamindriyāṇām|
tasmādanityeṣu nirātmakeṣu duḥkheṣu me teṣvapi nāsti saṃgaḥ||16||
yataśca lokaṃ samajanmaniṣṭhaṃ paśyāmi niḥsāramasacca sarvam|
ato dhiyā me manasā vibaddhamasmīti me neñjitamasti yena||17||
caturvidhe naikavidhaprasaṅge yato'hamāhāravidhāvasaktaḥ|
amūrcchitaścāgrathitaśca tatra tribhyo vimukto'smi tato bhavebhyaḥ||18||
aniścitaścāpratibaddhacitto dṛṣṭaśrutādau vyavahāradharme|
yasmāt samātmānugataśca tatra tasmād visaṃyogagato'smi muktaḥ||19||
ityevamuktvā gurubāhumānyāt sarveṇa kāyena sa gāṃ nipannaḥ|
praverito lohitacandanākto haimo mahāstambha ivābabhāse||20||
tataḥ pramādat prasṛtasya pūrvaṃ śruvā dhṛtiṃ vyākaraṇaṃ ca tasya|
dharmānvayaṃ cānugataṃ prasādaṃ meghasvarastaṃ munirābabhāṣe||21||
uttiṣṭha dharme sthita śiṣyajuṣṭe kiṃ pādayorme patito'si murdhnā|
abhyarcanaṃ me na tathā praṇāmo dharme yathaiṣā pratipattireva||22||
adyāsi supravrajito jitātmannaiśvaryamapyātmani yena labdham|
jitātmanaḥ pravrajanaṃ hi sādhu calātmano na tvajitendriyasya||23||
adyāsi śaucena pareṇa yukto vākkāyacetāṃsi śucīni yatte|
ataḥ punaścāprayatāpasaumyāṃ yatsaumya no vekṣyasi garbhaśayyām||24||
adyārthavatte śrutavacchrutaṃ tacchrutānurūpaṃ pratipadya dharmam|
kṛtaśruto vipratipadyamāno nindyo hi nirvīrya ivāttaśastraḥ||25||
aho dhṛtiste'viṣayātmakasya yattvaṃ matiṃ mokṣavidhāvakārṣīḥ|
yāsyāmi niṣṭhāmiti bāliśo hi janmakṣayāt trāsamihābhyupaiti||26||
diṣṭyā durāpaḥ kṣaṇasaṃnipāto nāyaṃ kṛto mohavaśena moghaḥ|
udeti duḥkhena gato hyadhastāt kūrmo yugacchidra ivārṇavasthaḥ||27||
nirjitya māraṃ yudhi durnivāramadyāsi loke raṇaśīrṣaśūraḥ|
śūro'pyaśūraḥ sa hi veditavyo doṣairamitrairiva hanyate yaḥ||28||
nirvāpya rāgāgnimudīrṇamadya diṣṭyā sukhaṃ svapsyasi vītadāhaḥ|
duḥkhaṃ hi śete śayane'pyudāre kleśāgninā cetasi dahyamānaḥ||29||
abhyucchrito dravyamadena pūrvamadyāsi tṛṣṇoparamāt samṛddhaḥ|
yāvat satarṣaḥ puruṣo hi loke tāvat samṛddho'pi sadā daridraḥ||30||
adyāpadeṣṭuṃ tava yuktarūpaṃ śuddhodano me nṛpatiḥ piteti|
bhraṣṭasya dharmāt pitṛbhirnipātādaślāghanīyo hi kulāpadeśaḥ||31||
diṣṭyāsi śāntiṃ paramāmupeto nistīrṇakāntāra ivāptasāraḥ|
sarvo hi saṃsāragato bhayārto yathaiva kāntāragatastathaiva||32||
āraṇyakaṃ bhaikṣacaraṃ vinītaṃ drakṣyāmi nandaṃ nibhṛtaṃ kadeti|
āsīt purastāttvayi me didṛkṣā tathāsi diṣṭyā mama darśanīyaḥ||33||
bhavatyarūpo'pi hi darśanīyaḥ svalaṃkṛtaḥ śreṣṭhatamaigurṇaiḥ svaiḥ|
doṣaiḥ parīto malinīkaraistu sudarśanīyo'pi virūpa eva||34||
adya prakṛṣṭā tava buddhimattā kṛtsnaṃ yayā te kṛtamātmakāryam|
śrutonnatasyāpi hi nāsti buddhirnotpadyate śreyasi yasya buddhiḥ||35||
unmīlitasyāpi janasya madhye nimīlitasyāpi tathaiva cakṣuḥ|
prajñāmayaṃ yasya hi nāsti cakṣuścakṣurna tasyāsti sacakṣuṣo'pi||36||
duḥkhapratīkāranimittamārtaḥ kṛṣyādibhiḥ khedamupaiti lokaḥ|
ajasramāgacchati tacca bhūyo jñānena yasyādya kṛtastvayāntaḥ||37||
duḥkhaṃ na me syāt sukhameva me syāditi pravṛttaḥ satataṃ hi lokaḥ|
na vetti taccaiva tathā yathā syāt prāptaṃ tvayādyāsulabhaṃ yathāvat||38||
ityevamādi sthirabuddhicittastathāgatenābhihito hitāya|
staveṣu nindāsu ca nirvyapekṣaḥ kṛtāñjalirvākyamuvāca nandaḥ||39||
aho viśeṣeṇa viśeṣadarśin stvayānukampā mayi darśiteyaṃ|
yatkāmapaṅke bhagavannimagnastrāto'smi saṃsārabhayādakāmaḥ||40||
bhrātrā tvayā śreyasi daiśikena pitrā phalasthena tathaiva mātrā|
hato'bhaviṣyaṃ yadi na vyamokṣyaṃ sārthāt paribhraṣṭa ivākṛtārthaḥ||41||
śāntasya tuṣṭasya sukho viveko vijñātatattvasva parīkṣakasya|
prahīṇamānasya ca nirmadasya sukhaṃ virāgatvamasaktabuddheḥ||42||
atho hi tattvaṃ parigamya samyaṅnirdhūya doṣānadhigamya śāntim|
svaṃ nāśramaṃ samprati cintayāmi na taṃ janaṃ nāpsaraso na devān||43||
idaṃ hi bhuktvā śuci śāmikaṃ sukhaṃ na me manaḥ kāṃkṣati kāmajaṃ sukham|
mahārhamapyannamadaivatāhṛtaṃ divaukaso bhuktavataḥ sudhāmiva||44||
aho'ndhavijñānanimīlitaṃ jagat paṭāntare paśyati nottamaṃ sukham|
sudhīramadhyatmasukhaṃ vyapāsya hi śramaṃ tathā kāmasukhārthamṛcchati||45||
yathā hi ratnākarametya durmatirvihāya ratnānyasato maṇīn haret|
apāsya saṃbodhisukhaṃ tathottamaṃ śramaṃ vrajet kāmasukhopalabdhaye||46||
aho hi sattveṣvatimaitracetasastathāgatasyānujighṛkṣutā parā|
apāsya yaddhyānasukhaṃ mune paraṃ parasya duḥkhoparamāya khidyase||47||
mayā nu śakyaṃ pratikartumadya kiṃ gurau hitaiṣiṇyanukampake tvayi|
samuddhṛto yena bhavārṇavādahaṃ mahārṇavāccūrṇitanaurivormibhiḥ||48||
tato ministasya niśamya hetumat prahīṇasarvāsravasūcakaṃ vacaḥ|
idaṃ babhāṣe vadatāmanuttamo yadarhati śrīghana eva bhāṣituṃ||49||
idaṃ kṛtārthaḥ paramārthavit kṛtī tvameva dhīmannabhidhātumarhasi|
atītya kāntāramavāptasādhanaḥ sudaiśikasyeva kṛtaṃ mahāvaṇik||50||
avaiti buddhaṃ naradamyasārathiṃ kṛtī yathārhannupaśāntamānasaḥ|
na dṛṣṭasatyo'pi tathāvabudhyate pṛthagjanaḥ kiṃbata buddhimānapi||51||
rajastamobhyāṃ parimuktacetasastavaiva ceyaṃ sadṛśī kṛtajñatā|
rajaḥprakarṣeṇa jagatyavasthite kṛtajñabhāvo hi kṛtajña durlabhaḥ||52||
sadharma dharmānvayato yataśca te mayi prasādo'dhigame ca kauśalam|
ato'sti bhūyastvayi me vivakṣitaṃ nato hi bhaktaśca niyogamarhasi||53||
avāptakāryo'si parāṃ gatiṃ gato na te'sti kiñcit karaṇīyamaṇvapi|
ataḥparaṃ saumya carānukampayā vimokṣayan kṛcchragatān parānapi||54||
ihārthamevārabhate naro'dhamo vimadhyamastūbhayalaukikīṃ kriyām|
kriyāmamutraiva phalāya madhyamo viśiṣṭadharmā punarapravṛttaye||55||
ihottamebhyo'pi mataḥ sa tūttamo ya uttamaṃ dharmamavāpya naiṣṭhikam|
acintayitvātmagataṃ pariśramaṃ śamaṃ parebhyo'pyupadeṣṭumicchati||56||
vihāya tasmādiha kāryamātmanaḥ kuru sthirātman parakāryamapyatho|
bhramatsu sattveṣu tamāvṛtātmasu śrutapradīpo niśi dhāryatāmayam||57||
bravītu tāvat puri vismito janastvayi sthite kurvati dharmadeśanāḥ
aho batāścaryamidaṃ vimuktaye karoti rāgī yadayaṃ kathāmiti||58||
dhruvaṃ hi saṃśrutya tava sthiraṃ mano nivṛttanānāviṣayairmanorathaiḥ|
vadhūrgṛhe sāpi tavānukurvatī kariṣyate strīṣu virāgiṇīḥ kathāḥ||59||
tvayi paramadhṛtau niviṣṭatattve bhavanagatā na hi raṃsyate dhruvaṃ sā|
manasi śamadamātmake vivikte matiriva kāmasukhaiḥ parīkṣakasya||60||
ityarhataḥ paramakāruṇikasya śāsturmūrdhnā vacaśca caraṇau ca samaṃ gṛhītvā|
svasthaḥ praśāntahṛdayo vinivṛttakāryaḥ pārśvānmuneḥ pratiyayau vimadaḥ karīva||61||
bhikṣārthaṃ samaye viveśa sa puraṃ dṛṣṭīrjanasyākṣipan
lābhālābhasukhāsukhādiṣu samaḥ svasthendriyo nispṛhaḥ|
nirmokṣāya cakāra tatra ca kathāṃ kāle janāyārthine
naivonmārgagatān parān paribhavannātmānamutkarṣayan||62||
ityeṣā vyupaśāntaye na rataye mokṣārthagarbhā kṛtiḥ
śrotṛṇāṃ grahaṇārthamanyamanasāṃ kāvyopacārāt kṛtā|
yanmokṣāt kṛtamanyadatra hi mayā tatkāvyadharmāt kṛtaṃ
pātuṃ titkamivauṣadhaṃ madhuyutaṃ hṛdyaṃ kathaṃ syāditi||63||
prāyeṇālokya lokaṃ viṣayaratiparaṃ mokṣāt pratihataṃ
kāvyavyājena tattvaṃ kathitamiha mayā mokṣaḥ paramiti|
tadbuddhvā śamikaṃ yattadavahitamito grāhyaṃ na lalitaṃ
pāṃsubhyo dhātujebhyo niyatamupakaraṃ cāmīkaramiti||64||
saundarananda mahākāvya meṃ "ājñā-vyākaraṇa" nāmaka aṣṭādaśa sarga samāpta|